救一個二十年前死咗嘅女人（上）
搬入呢間屋之前，我就知道，呢度死過人。
「二十年啦，我仲記得，吳大用追住佢老婆出走廊，係咁斬係咁斬，斬到成條走廊都係血。我本來要出門口買嘢，嚇到即刻縮番入屋報警。」鄰居咁樣講。
我有搵番當年嘅新聞，死者方小雯，死於2001年7月14日，後來吳大用判咗終身監禁。
我答：「呢件事我都知，不過我唔驚鬼。」
「你驚鬼都唔緊要，雖然方小雯死得慘，但呢度二十年嚟都冇鬧過鬼。」
鄰居嘆氣：「小雯係個好女人，就係細膽啲，最慘就嫁咗個衰老公，一飲醉酒就打老婆。佢咁好人，死咗都唔會變鬼番嚟騷擾人啦。」
唉，都唔明吳大用係點樣諗，我雖然未有女朋友，但我好肯定，第日我有老婆，我一定會好好保護佢，絕對唔會打佢囉。
點都好，呢件事已經過去咗二十年，同我都冇咩關係。
我住咗入呢間屋，果然冇咩靈異事件，我漸漸淡忘呢單凶案。
直到有一次，我諗住換張床，呢張床用咗好多年，每手業主都剩係換床褥，我見張床咁舊，就想換埋佢。
搬運工搬開張床，喺床同牆中間，執到一本發黃嘅簿仔，遞咗畀我。
我揭咗幾頁，係方小雯嘅日記。
「2000年2月8日
今日佢冇飲酒，我好開心，想同佢商量吓，畀我出去搵工。
但佢好嬲，話佢又唔係冇畀家用，我唔應該去拋頭露面。
我想講，佢今個月的確冇畀家用，但我唔敢開口。
算啦，我再慳啲駛，午飯佢唔喺屋企食，我自己一個，其實可以唔食。
我諗佢下個月出咗糧，就會畀家用㗎啦。」
「2000年2月10日
尋晚佢飲醉咗，拎我部電話嚟掟我。
我閃開咗，電話爛咗，啊啊啊，我冇錢換電話㗎。
唉，我真係好後悔，應該飛身接住部電話，俾電話掟吓有幾痛啫？」
我一頁一頁咁睇，幾乎每一頁，都係小雯嘅被虐記錄，從肉體、精神到財政，都被吳大用所折磨。
但小雯從來冇諗過反抗，從佢嘅字裡行間，我仲感覺到，佢期待吳大用會變好。
我一路睇一路嘆氣，睇到四月嘅日記，唔小心將飲緊嘅可樂濺咗落日記上，我急忙去擦，但已經喺書頁上留下可樂跡。
呢個時候，日記上突然出現一段話：
「2000年4月10日
好奇怪，我本日記突然出現啡色嘅水跡，仲濕濕地。
我好耐冇飲過飲料，發生咩事？」
我呆一呆，拎起支筆喺下面寫：「你好，方小雯。」
日記上出現一行字：「！！！你係邊個？點解我本日記會突然有你嘅字？」
我嘅猜想得到證實，透過呢本日記，我可以同二十年前嘅小雯溝通！
咁即係話，我有機會幫佢逃過死劫。
我即刻答：「我來自未來，我係你嘅守護天使。」
小雯回覆：「守護天使？唔好玩啦。」
呢句說話令我清醒咗啲，我意識到，我出現嘅方式咁詭異，如果我依加就同小雯講，三個月後，吳大用會殺死佢，佢一定唔會信我。
一個唔小心，佢覺得呢本日記太恐怖，從此唔寫日記，咁就弊啦。
我眼珠一轉，先上網搵咗2000年4月嘅股票情況，寫落日記度，以取得小雯嘅信任。
過幾日，小雯好開心咁寫：「係真㗎，你真係有預知未來嘅能力。」
「我唔係預知未來，我就係來自未來。」我答。
小雯問：「都一樣啦，你可唔可以寫多幾隻股票畀我？有六合彩就更加好，我交畀老公，佢賺咗錢一定會好開心。」
唉，呢個傻女人。
我提醒佢：「吳大用會好開心，跟住呢？開心到三日唔打你？」
「老公只係心情唔好，可能佢際遇好啲，就唔會再打我。」
我問：「呢句說話，你自己信咩？」
「……係我條命唔好，唯有希望佢慢慢變好啦。」小雯答。
我再都忍唔住，寫出真相：「冇慢慢啦，7月14號，吳大用會將你斬死。」
小雯即刻答：「亂講！」
小雯好似嬲咗我，過咗好耐先再覆我。
吳大用限制晒佢嘅行為同交友，佢好寂寞，所以佢一得閒就同我傾計。
但係，我哋交流嘅時候，佢有意迴避「吳大用斬死佢」呢個預言，我諗佢真係接受唔到呢個事實。
時間一日一日咁過去，距離小雯嘅死期愈嚟愈近，我實在忍唔住，成日重覆呢單凶案嘅詳情，希望小雯信我。
終於，去到六月，小雯突然寫：「我諗，你講嘅係真話。呢排佢脾氣愈嚟愈差，打我都開始用工具……」
我好興奮，我終於可以改變小雯嘅命運：「咁你仲等咩？趁佢返咗工，你快啲走啦。」
「我可以去邊？我冇娘家，又冇錢。」
小雯居然問：「如果我7月14嗰日，整病自己，一早就去醫院睇病，坐足一日，咁咪避得開囉。」
我真係俾佢激死：「你唔好咁傻啦，就算你7月14唔死，只要你唔離開佢，佢遲早都會打死你。」
下集：https://bit.ly/3jtKqKw
將專頁設定為「搶先看」/ "See first"，最新故仔馬上睇！
我救咗條美人魚：https://goo.gl/QTCc6Y
睡公主的詛咒：http://bit.do/e6DFj
#短故 #短篇 #小說 #陳美濤 #廣東話 #粵語 #tomatochan #救一個二十年前死咗嘅女人
Search